Nieuwjaarsconference 2010

7-1-2010 door: Redactie
Ook dit jaar weer een Nieuwjaarsconference die werd voorgedragen door Sacha van de Ven en Marc Joosten. Voor de inhoud tekende evenals vorige jaren Ger Gubbels. De tekst is in het Horster dialect geschreven.
Videoregistratie van de nieuwjaarsconference door Marc Joosten en Sacha v.d. Ven (tekst: Ger Gubbels)

Sacha: Gojemiddág meense oêt os neeje groête Hôrs aan de Maas, allemaol.

Marc: Wát Hôrs aan de Maas, dát is officieel nag ni officieel... Zerum wój dát toch ni? Die wóje Hôrs ni in de naam, of in elks gevâl Zerum d’rbeej. Zo’n sort station… De neej raod zuj dát motte gaon beslisse. Weej zien eigelijk nag ’n naamloze gemaent, eigelijk ni miër as ‘n Dorp aan de Rivier…

Sacha: Jao, tot nog toe ziën we d’r alliën nag ma op achteroêt gegaon: Alles zit d’r a te kome, ma ’t is d’r nag ni: genne naam, genne raod, gen wethouders

Marc: En zelfs d’n burgemeister is ni officieel

Sacha: Nou, da beginne we gewoën veur a: gojemiddág meense oêt America, Brokeze, Brokezevôrs, Evertsoord, Griendtsveen, Grubbevôrs, Haegelsum, Hôrs,

Marc: Kroënenberg, Lottum, Melderse, Miëldere, Miëterik, Swolge, Tiendere en … Zerum

Sacha: Waorum zegde geej nou krek Zerum wer as lest?

Marc: Dát is ni verspres: ’t is alfabetische volgorde en Zerum schriefde met ’n Z…

Sacha: Ma gâns Zerum huurt nou vort beej Hôrs

Marc: Nae, Sacha, ni gâns Zerum, zo’n anderhalve verkânte maeter blieft dapper waerstand biede tegge de hebberige Dreumels

Sacha: Hoe kán dát?

Marc: Iets met ‘nen ezel, geluuf ik, of misschien wál ’n draenkske oêt Toêverland dát d’n druide Mengde…

Sacha: Hoe dán ok: allemaol ’n zalig en gezoond Neejjaor

Marc: Prospero anno nuevo

Sacha: Wát zegde?

Marc: Prospero anno nuevo, dát is zalig neejjaor vur de meense met de Mexicaanse griep…

Sacha: Wát ’n jaor, hè Marc, ‘t jaor ván de soaps

Marc: Op de iërste pláts de fusiesoap. ’t Ganse jaor door is d’r gestreveld en gesteggeld

Sacha: En geld opgemákt: book oetgaeve, film make, kunstwerke neerzette, afscheidsfiëst

Marc: Reisje nao Ierland, cadeautje nao Nieuw-Zeeland

Sacha: En dán nag ’t drama Blitterswieck: waoj gaer beej Hôrs, ma is nou door Venroij verzwolge

Marc: Jao, Venraoij leedt ok vort án de Maas

Sacha: Zund dát din burgemeister d’roetscheit, anders waor ‘t ’t land van Maas en Waals

Marc: D’r waore toch meense die wát probleme haje met Waals

Sacha: Ach, in Vlaandere haet iederiën probleme met Waals

Marc: Vurzichtig Sacha, as geej in ’n glaze hoês woënt, motte ni met keier goeje

Sacha: Schon wah, dát glaze hoês in Zerum. En brengt ma lifst 13.500 euro op

Marc: En nou wil Roy Boute in 2011 ’t Glaze Hoês op de Floriade

Sacha: Ma dát ding velt dao ga ni op tusse ál di glaastuinbouw

Marc: Ma hedde nag ‘ne soap?

Sacha: Jao, de soap ván de verkiezinge: 5 parteje, aoverál reclameborden, greun krukke, mysterieuze spreuke

Marc: En in de ganse neej gemaent strukelde zaowát ovver de landelijke politici

Sacha: Ge zaogt door de bobo’s Wouter Bos ni miër

Marc: CDA, D66, Essentie, PvdA-PK en SP

Sacha: Waorum zette geej de SP achter-a? Net of geej die op veurhand boêtespel zet

Marc: Toeval, ok wer alfabetische volgorde. Normaal gespraoke haaj de VVD achter-a gestaon

Sacha: Wao is de VVD eigelijk gebleve?

Marc: In Essentie is die opgegaon in ’n ander parteej.

....

 

  • Klik hier voor de video van de nieuwjaarstoespraak 2010
Disclaimer | Copyright© 2018 Kempen Media b.v. | Ontwerp & realisatie Kempen Communicatie
Kempen Media b.v. is partner van Kempen Communicatie b.v.
Kempen Communicatie: Strategie, Creatie, Realisatie