Dorpen oppimpe, nieuwe kalender en andere zaken

2-1-2015 door: Redactie
Ook dit jaar schreef Ger Gubbels weer de nieuwjaarsconference in Horst aan de Maas. Deze werd op donderdag 1 januari voorgedragen door Marc Joosten en Sacha van de Ven. Zij bespraken de meest opvallende gebeurtenissen in onze gemeente van het jaar 2014. Hieronder de gehele tekst.
maskTop
Dorpen oppimpe, nieuwe kalender en andere zaken
maskBottom

M. Gojemiddág, meense oêt Hôrs aan de Maas

S. Allemaol ’n zalig neejjaor, live vánoêt Herberg de Troost

M. Nou, zaowied ziên we nag lang ni, we zitte nag gewoën op ‘t ald

S. Jao, dát wiêt ik, ma ’t stiët d’r toch án te kome, 8 miljoen zuj de

verbouwing gaon koste

M. Wie zâg dát? Wethouder ván Rensch of iemes di wál kán raekene?

S. Jao, dao ging di wethouder duchtig oonderoêt beej die verbouwing

ván sporthal de Kruisweide in Zerum

M. Heej haet zich twië ton verteld, heb ik meej laote vertelle

S. Ma heej waor wál sportief: heej alle schuld op zich genaome

M. die twië ton?

S. Nae, de schuld ván die telfout. En nou keumt d’r nag ‘ne kiêr

130.000 euro beej, umdát ze neet op de invalide-veurzieninge geraekend haje

M. Ma ’t schient allemaol gen probleem te ziên: ze gaon 25.000 euro per jaor bespare op de energiekoste

S. Oh, ma dán is de gemaent ovver 13 jaor oêt d’n ozel

M. Jao, en de sporters in die hal ok

S. Birgit op de Laak haet ’t nag heit gehad dit jaor, die zaot in de race vur beste bestuurder ván Nederland

M. En? Dát zal ze toch wál gewonne hebbe?

S. Waorum mende geej dát?

M. Ze lut rechts aaltiêd vur gaon, zelfs as links duchtig gewonne haet

S. Nae, ma ze haet ni gewonne. De jury vóng dát ze toch wát duk ‘nen BOB nuüdig haaj

M. Jao, die politiek, Kees ván Rooij lut zien snor staon

S. stiekem, zoonder ’t bekend te make, zeg ma, zoë tusse neus en lippe door

M. Ma ik vóng ’t neet oêtzeen, net burgemeister Peppone ván Don Camillo

S. Ik wiët ni of d’n daeke dát ’n compliment vingt …

M. Ma Kees haaj neet alliën ‘ne snor, heej haaj ok ‘ne neje sik

S. Nae, Marc, nou vergiste geej ow: beej Kees haet d’r niks án de kin gehange

M. Zao’ne sik bedoel ik ok ni, ik bedoel ‘ne neje secretaris: Hans van der Noordt

M. Ovver snorre geprot: Thijs Coppus drukt zien snor: heej haet ’t wál gezeen in Hôrs.

S. Jao, heej haet ’t vort te druk in Den Haag

M. Zaet ie, ma glúfde geej dát? Din is gewoën teleurgesteld in de Hôrster politiek

S. Hoe mende?

M. Heej is de groëte winnaar ván de verkiezinge, haopte op ’t pluche ván ‘ne wethoudersstool, ma eindigt toch wer op ’n klapstulke ván de Haas

S. Ma Leon Litjens din haet toch oonderhandeld? Of informateurtje gespeuld?

M. Krek, dát is ‘t ‘m. Iederiën wet, dát din zelfs de roëje paprika’s links lut ligge

S. Ma di Leon Litjens haet vort ’n zwaor baan

M. Ach, ’t zuj wát

S. Nae, ’t werk op zich dát velt wál mej, ma heej zuut elken daag ván oêt zien werkkamer ’t Floriadeterrein ligge, ’n sort Tantaluskwelling

M. ’t Floriadeterrein, wao Venle en Hôrs straks same ’n zwembad wille ánlegge: ze hove alliën nag ma beton te storte in di bodemloze put

S. Nae, ik daenk, dát dát zwembad dao ni doorgiët. D’r zien planne vur ’n sportcentrum in Kasteelpark ter Horst

M. in de Moelbaerenbos mende geej? Wao de fusiekorfbalclub ván de Miëterik, America, Hôrs en Haegelum vort oonder de naam Oxalis zien thoêswedstrijde speult?

S. Ja, dát ok, ma dao keumt ’n sort Papendal án de Maas, mét ‘n zwembad

M. ’t Marie-Louise Vaessen zwemstadion

S. En de Paul Verhaegh-arena

M. Di speulde toch ma moëj op ‘t WK in Brazilië

S. Nico Freriks volleyt in Teheran op hoëg niveau

M. Ja, 1500 maeter bovve de ziëspegel

S. Mike Cleven wuurdt derde op ’t WK veldschete

M. Dominique Janssen wuurdt Europees kampioen met de voetbalmegjes en plátst zich ok nag vur ’t WK met de groëte vrollie

S. en ovver Dirk Marcellis stóng in de krant, dát heej ien ván de wiënige voetballers is die kunne laeze

M. De krant zeker? Di lust ie ván A tot Z,

S. en sindskort ván B nao A

M. En dán is ie ok nag vader gewaore, ván zoen Jord

S. Jao, schattig hè, en de naam keumt ván ’n Paninipletje ván de Plus

M. Ma good, dát ze dao toen net gen biëstepletjes haje: Skippy, Fury, Black Beauty

S. Nae, Black Beauty móg nimmer, ’t is vort gewoën Beauty

M. Och, die Zwárte Pietdiscussie. Dao erger ik mee greun en gael a

S. Jao, zien we net ’n bitje zaowied, dát we geaccepteerd hebbe, dát jónges oêrbelle drage, mot Zwárte Piet ze wer oêt

M. Ma we haje ’t ovver sporte: Anne en Fieke Reijntjes oêt Miëldere woare de sporters ván ’t jaor

S. en Finn Timmermans oêt Brokezevôrs ’t sporttalent

M. En ‘t veertal ruiters ván Wittenhorst waor de sportploog ván ‘t jaor

S. Die sprónge d’r zeker oêt?

M. Ja, lach d’r ma mej, lot die paerd ma los: we kriêge ’t Equestrian Center de Peelbergen in de Kroënenberg, gebouwd dór de gebreurs ván Grunsven

S. ván Grunsven? De brurkes ván Bonfire?

M. Ván Ankie, jao, ze hebbe wát hindernisse motte neme, ma ze zien nou toch án ’t bouwe. Dit jaor giët ’t ál aop

S. Ik heb zelfs al ’n kerskaart gehad van ze: merrie Christmas

M. Ik ving ’t nag steeds ’n gemiste kans: equestrian center de Peelbergen.

S. Hoe bedoelde?

M. Dát haet gen Europese oêtstraoling, ’t is zao kneuterig. Equestrian Center de Peelbergen deut meej daenke án poneypark Slagharen

S. Wát stelde geej veur daan?

M. Ik zuj ’t gâns verengelse: Equestrian Center Horse, Equestrian Center Horse upon Maas.

S. Ach, allemaol die Engelse name teggewaorig. Di fietspaad ván Hôrs nao Venle nevve ’t spaor, waorum het di: Greenport Bikeway?

M. Jao , dao hedde geliêk i, waorum het di ni gewoën: fietspaad ván Hôrs nao Venle

S. Ja, en in Venle het ie da: fietspaad ván Venle nao Hôrs. Dudelijker kán ’t ni. Hedde nag miêr Engels?

M. Ja, Powerman stopt met de Night Run, stiët d’r in de krant. Waorum stiët dao ni: in Hôrs wúrdt in d’n dúster nimmer gerend?

En daovur in de pláts waoje ze dán op de zaoterdágaovend de Highland Games

S. Ma die zien toch ni doorgegaon? Dát veel de organisatie kald op ’t liêf

M. Net as de Ice bucket challenge

S. Die ging toch wál door? Dao haet Kees nag a mejgedaon

M. Jao, di ging wál door, ma ’t veel toch kald op ’t liêf

S. Wát ’n ge-emmer, hè?

M. Um ’n klats water. En da hedde nag de truckrun …

S. Ok ’n Engels waord

M. Nae, ma dao mógde nimmer geclaxonneerd waere. De pliessie zuj boetes gaon gaeve

S. Wát? Zien die gans betoeterd?

M. Dát vóng Roy Bouten ok. Di waoj die boetes wál betale

S. Jao, Roy Bouten, ’t iënige raodslid, dát gespierde taal lut zeen

M. in de Arena, ja. Ma nou we ’t ovver Roy hebbe: hedde geej trouwes ál gehuurd, dát Lottum zelfstandig wil waere?

S. Lottum zelfstandig?

M. Ja, met de paerdemaert hebbe ze ál ves geoefend met paspaortcontroles vur paerd en de illegale biëste zien drek teruggesteurd

S. ’n Belse knol met ’n verloëpe ID-kaart, ’n paar Shetlandponeys zoonder verbliefsvergunning, 2 verdachte Arabiere en iën przewalskipaerd

M. En persant hebbe ze de meense a-gehalde en gecontroleerd op belastingschuld. Dát haet 20.000 euro opgeleverd

S. Jao, de toekomst vur de vrijstaat Lottum zuut d’r roëskleurig oêt

M. Ze hebbe ok ál ’n keuniging, ‘n roëzekeunigin mét ‘ne lakei

S. LAKEI oêt Lottum haet d’n oondernemerspriês gewonne

En Faunatics de Jo Janssenpriês

M. En da kunne ze oêt de umliggende däörpe ridders roonsele

Zoeas oêt de Melderse Keijsers Mies, oêt Lottum Hay Soree

En oêt Hôrs Theo en Marleen, dao hóft gennen achternaam beej

S. En d’r waore d’r nag miër met zien beje:

Ok Jan en Riny Brouwers wórde keuninklijk oonderscheje

M. En oêt Swolge de hiëre van Wijk, Martens en Ebbenhorst

En Michel Peeters en Jos Strijbosch oêt Grubbenvorst

S. In Lottum zaot d’n brandwaer kort beej ’t veur:

Peter en Herman van de Pasch én Piet Vorstermans, ’n lintje vur eur.

M. In Brokeze kraege Twan Hoeijmakers en Jos Vousten ’n lint

En in Miëldere haaj Leo Willems ’t verdind

S. In Zerum veel ’t mej met de lintjesraegen,

Dao kome we alliën Mieke Bouwman-van Gelder taege,

M. En in Griendtsveen haet ’t ziene majesteit moge behage,

Dát Annie van Limbeek vort zien lintje móg drage

S. In Hôrs is de harmonie duchtig gefêteerd,

Want beej eur zien Pierre Duchateau en Nico van Tilburg met ’n orde vereerd

M. En ’t haet de keuning naturlijk good gedaon,

Dát Anneke Vossen-Speijken heej jaore haet gestaon

S. Tenslotte motte we Wil Thijsse oêt Hôrs ni vergaete

En Joop de Hoon, ge wet wál, din in de raod haet gezaete.

M. En da waor d’r natuurlijk nag, speciaal vur de kiendere

’n gemaentelijk lintje vur Sjuul Philipsen, jús jao, oêt Tiendere

M. Jao ma, Sacha, weej haje ’t ovver die 20.000 euro die de belasting in Lottum haet gevange. Daovaan kunne ze Lottum ok moëj verhaegelsumme

M. Verhaegelsumme?

S. Ja, dát is ’t oppimpe ván ow däörp met eige ideeë, eige meense en andermans geld. Hegga kriegt 15.000 euro ván de Rabo

M. Oh, geej ment dát project waobeej d’n Haegelsum geletterd giët waere

S. Ja, de 8 letters ván Hegelsom 2½ maeter hoëg beej de invalswaeg ván ’t däörp. En die letters moge ze zelf pimpe

M. Ma dát zuj niks vur Evertsoord ziên

S. Waorum ni? Mende geej dát die ni creatief ziên?

M. Dát wál, ma die hebbe gen 10 toegangswaeg

S. Ma wál Menno Buch op bezeuk gehad

M. Da’s waor, dát waor ’n boeiend programma, Buch in de bajes

S. Ma ze zien Hôrs ok schon án ’t verhaegelsumme. D’r kome ovveraal pleine beej

M. Ja, as ge pleinvrees het, da motte nimmer in Hôrs ziên

S. Iërs ’t Lambertusplein opgeknapt met ’n prachtige fontein

M. Da’s waor, ma miër is d’r ok ni te doon op dát plein

S. Nou Marc, verget ’t hundje ni

M. Nae, ma ik bedoel, as ik oëits ’n laeg plein heb gezeen, dán is dát ’t Lambertusplein wál

S. Ma dát guft toch niks?

M. Nae, ma da motte ze de naam verandere: Plein van de Hemelse Vrede: de kerk nevve de deur en as ‘t ’n bitje waeit werde gezaegend

S. Spot d’r ma mej: Cay Kleeven en Christ Coppes hebbe d’r ’n wc beej motte make

M. Waorum dát da?

S. Door dát geklater de gansen tiêd motte meense iër nao de wc.

M. En dán hedde nag d’n tragischen aoliebollekraom

S. Waorum tragisch?

M. Di zit met de gebakke paere. En neet alliën paere! Di blieft aoveraal mej zitte. Ma de beste aolieböl ván Nederland zitte in Zerum, ván de gebroeders Gommans

S. Ma Marc, verget ’t hundje ni

M. En zoë hebbe we midden in däörp vort ’t Lambertusplein en ’t Wilhelminaplein, ’n waterplein en ’n Waterloosplein, ma ja, dao hebbe ze wál wer beer

S. Marc, ’t hundje …

M. En ‘ne lama hebbe ze ok op ’t Wilhelminaplein

S. Wát hebbe ze dao?

M. ‘ne Lama. ’n Paar jóngere hebbe dao op ‘ne vriedágaovend ‘ne witte lama gezeen

S. Haje die jónges gedroonke?

M. Nae, want dán haje ze d’r wál twië gezeen. Nae, ma later bleek ’t trouwes ’n damhert te ziên dát op zeuk waor nao ’t schaakbord ván Jan ván Heijster

S. Nou geej ’t ovver lama’s hed: Jan Janssen oêt d’n Haegelsum haet d’n dalai lama gespraoke en heej waor in New York genomineerd vur de Lucy Award

M. Ma wao haje we ’t ok al wer aover?

S. Ovver dát hundje …

M. Tja, dát hundje. Vul meense make zich druk um ’t feit, dát dát hundje zittend plast … Nou, dát kán ik ok, huur

S. Nae, Marc, ’t giêt d’rum dát ’t ni natuurlijk is. ‘nen Hoond di zittend plast mot op zien minst ongemekkelijk kieke.

M. Jao, ik snap ‘m. En dezen hoond di kiekt as of ie net RinTinTin en Lassie opgeschreven haet

S. Ma ’t giët toch ok um ’t versje. Dát versje klopt ni

M. Nae, toch wál erg toevallig, wah, gâns Hôrs en umstreke kent dát versje en net din iëne meens din ’t nimmer precies kent, di wúrdt um de tekst gevraogd

 S. Jao, dá’s waor, zulle we ’t nag iëne kier veur doon met z’n álle:

 Hedde dôrs,

Da godde nao Hôrs

Dao stiët ’n hundje

Dát pist ow in ’t mundje

 M. Goed zo, en vur de rest zal dát biëst de komende 6 waeke nag wál ’n paar kiêr bespraoke waere, daenk ik

S. Neet alliën Hôrs, ma ok Tiendere haet trouwes ’n watertappunt in däörp, ma dao keumt d’r Lourdeswater oêt

M. Ohoh, wát haet dát wál ni gekost, 1700 kilomaeter leiding?

S. Nae, dát haet de WML vur ’n groët diël betáld. Die ván Tiendere zien oêtgekiend

M. Jao, dát klopt, in Tiendere wúrdt nimmer gekiend

S. Ma we haje ’t ovver neje pleine in Hôrs?

M. Oh ja, we hebbe nag ’t Kloosterhofplein met de Wijsneusgroep. Die biëldegroep is vur de zaovulste kiër verplátst

S. Jao, ma Marc, dát leet aan de groep zelf: zao gauw die biëlde äörges staon, dán wiest di kabouter Wijsneus álwer de pláts a, wao heej de volgende kiër hin wil

M. En da kriege we beej ’t Gasthoês nag ’t Gasthoêsplein

S. Dát ving ik genne moëje naam, ok ’n bitje kneuterig, ’n bitje däörps

M. Oh? Wao daenkte geej dán a?

S. Beursplein. Net as in Amsterdam. En da mot d’r eigenlijk net as op ’t Lambertusplein, ok ’n standbiëld ván ‘n biëst kome

M. Heb ik ok ál bedócht: ’n schaop, en da beej de shoarmazaak ván Ramses vur de deur

S. Dát zal Marian Thieme leuk vinge …

M. Dát kán meej niks schille, en ok dao wil ik gaer ’n ald-Hôrster spraekwaord beej hebbe staon:

S. En dát is?

M. “Dao hedde ’t schaop án ’t schiête”

S. Oh En da kunne de kiender op ’n knúpke dowe …

M. Ma weej waore án ’t verhaegelsumme …

S. Ja, Brokezevôrs haet zich wer ’n kermis verhaegelsumd

M. Jao, ’t is nag gen Toverland, ma in elks geval wer ’n kern met ’n kermis

S. al motte ze wál zuinig án doon

M. Waorum?

S. Umdát de Rabo-bank de pinautomaat haet weggehaald, net as op de Melderse en án de Miëterik

M. En in Hôrs is de pinautomaat ván de ING ram weg

S. En nou waore ván de waek de pinautomate die ’t nag wál deje, laeg

M. Nae, de Rabo-bank haet wiënig reje vur ’n fiësje

S. Nou, dao waor Alfons Versteegen ’t ni mej aens: di nuüjde 2000 mân tegeliêk oêt op zien fiësje

M. Dát zal meej ’n knalfiëst zien gewaore

S. Zao’n knalfiëst haaj in Grubbevôrs ni gekund: dao haet de schuttereej nag stiëds ruzie met ’n paar buurtbewoëners

M. Ma as die schuttereej wer ’n kiêr ’t OLS wint, da kunne de toeschouwers vort met d’n trein kome: Grubbevôrs kriegt ‘n station

S. Met ’n stationsplein d’rveur. Dao kán da moëi ’n standbiëld ván de Toddezek op: zeej winne vur d’n derde kiër ’t LVK

M. Ja, en nou doon ze nimmer mej

S. Dát kán ok ni: de halve finale zit vol, ze hebbe d’r al 61!

M. En misschien zuj ’n NGB-plein in Grubbevôrs ok ni misstaon

S. ’n NGB-plein? Ma dát NGB is d’r toch nag ni?

M. Nae, ma toch zäörgt ‘t al jaore vur veul stóf

S. De Afterpartees hebbe ok vul stóf doon opwaeje: optraeje op Pinkpop én ze winne de cultuurpriês ván 2014 ván de Muzikantine

M. Michiel ten Horn wint met Aanmodderfakker 3 Goude kalvere

S. Um & Um kriêge de Veldeke Oeuvrepriês

M. Jolijn Ummenthun wint met eur zitvolleybalploog de sportpriês ván Venle

S. Peter van Dijck oêt America kriegt de Prix d’Asperge

M. en Willem Derks wint ’t muulke vur zien rol in Tot ik vlieg

S. Ma Marc, efkes wát anders: hedde geej ‘m ál hange?

M. Wát zegde geej?

S. Of geej ‘m ál hed hange?

M. Maar megje, ik bin krek heej

S. Nae, ik bedoel de kalender. Hedde geej de gemaentekalender ál hange?

M. Nae, dát giët nag ni, da mot ik iërs de keuke verbouwe

S. Waorum dát?

M. Nou heej vort twië waeke tegeliêk lut zeen, is ie aens zao groët en hungt ie beej meej ovver de lichtschakelaar

S. Dán hangde um toch äörges anders neer?

M. Giët ni, da mot ik texe wao heej tot nou toe haet gehange. ’t Kost meej aalt geld

S. En ik ving um ok ni duurzaam. ’n Bitje kalender mot toch zaowát ’n jaor mejkunne, dát zeej ik beej deze ni gebeure. Vurdát jannewari vurbeej is, is ’t getje oêtgelodderd.

M. Jao, ik daenk ok, dát ’t vur de kalender eind juni ál Aldjaor is

S. Hmm, en begeen juli ald pepeer

M. Ma we motte ’t jaor ni mopperend beginne

De gemaent haet ’n jaor d’n tiêd um wát anders te verzinne

S. wát ok wer good vur Adje is

Want di luüpt nou 2000 iêzere spirölkes mis

M. Ma ik bin beneejd wát ’t neje jaor ós brenge giët

Of de werreld nag miër iëlend te wachte stiët

S. Of dát ebola te geneze zal zien

en d’r ’n oplossing keumt vur de Oekraïen

 M. Hoe ’t wiër giët met de islamitische staat

Met de onthoëfdinge in naam ván ’t kalifaat

S. met de, zoë neume ze ‘t, humane rampe

zoë as de miljoene Syriërs in tentekampe

M. Want met aal dees ellende nevve de deur

Stelt os economische crisis toch eigelijk niks veur

S. en wát Hôrs án de Maas a-giët, ach, ’t keumt wál good

Dát zanike en moppere zit os in ’t blood

M. Laot 2015 ma kome, weej zien nou klaor,

S. vur ow allemaol de beste wense

MS en ’n zalig neejjaor

Disclaimer | Copyright© 2018 Kempen Media b.v. | Ontwerp & realisatie Kempen Communicatie
Kempen Media b.v. is partner van Kempen Communicatie b.v.
Kempen Communicatie: Strategie, Creatie, Realisatie